Ha, bi scho wieder uf Sendig, brutal was i fuer euch leischte!!!!!

Nei, isch eifach so das es im Moment grad passst u de ha i daenkt wieso o nid.

 

Auso in Granada, Nicaragua hei sich Ollty u i entschiede das mer Strecki zwuesche Panama u Suedamerika mit em ne Segelboot mache das nach Kolumbie fahre tuet. Kes Gstoehn waege Kolumbie: es git kei anderi Moeglichkeit nach Suedamerika zurzyt aus, entweder mit em Flueger oder mit em ne Boot nach Kolumbie ds shippe. De hei mer ues haut fuer die gmuetlichi Variante (oder o schoeneri ) entschiede. Ds Problem isch eifach ds Abfahrtsdatum gsi- hei echli muesse duer die reschtliche Laender (Nicaragua, Costa Rica u Panama) stresse das mer das Boot no rechzytig erreicht hei. Drum gits us dere Gegend eigentlich nid viel Bilder oder ds brichte, sorry.

 Viel Spass het sich derfuer uf de letsche Kilometer zum Boot igstellt. Zersch isch es ueber e aspruchsvolli Dirtroad zum ne Fluss gange, wo mer eigentlich ueberquere hette soelle. Da aber echli Hochwasser gherrscht het, si d'Indianer haut bis dert here mit em Kanu gfahre. Ds Verlade isch e Gaudi gsi, wie o d'Fahrt Richtig am Segelschiff. Bis jedem ds eigete Bike sicher uf em Schiff isch gsi, hett jede echli Bammel gah das irgend oeppis schief louft u dr Toeff irgendwo im Ozean untertoucht!!! Isch alles wie am Schnuerli glueffe u kes Problem gsi.

Die 4 Taeg wo die Ueberfahrt duret het si echli Ferie i de Ferie gsi, Karibikfeeling pur.

Ds Uslade isch diesmau uf em Gummibootli vom Schiff jewiels einzeln abglueffe, o kes Problem vorerscht. Denn irgend e Rivale vom Reiseveranstalter het e Azeig gmacht das mer die Toeff ilegal ids Land schleuse wei, das heisst dr Zoll isch cho u het uesi Toeffe beschlagnahmt!!! Nach zwe Taeg umehocke im Zollbuero si si de aber ohni Bestechig oder Buss wieder zruegg zu ues cho, nette Empfang in Kolumbie, nid?

Bi itze sit ere Wuche hie in Cartagena u warte das dr Olly sini neui Bankcharte bechunnt, so das mer zaeme duer Kolumbie travele tue. Isch echli touristisch hie mit vielne Bare wo chasch abstuerze. Stadt hesch o scho langsam gseh u de hett sich no d'Glaegeheit ergaeh zum Salsastunde ds naeh, stellet euch das vor: i u Salsa, bi froh das ke Videoufnahme existiere!!!

Sowit isch es o wieder emau fuer huet, muess mi mental u koerperlich (es Bierli zum Muskeluflockere) uf  d'Salsastund vorbereite. 

 

No oeppis bevor i schliesse: es isch wunderbar warm hie, nid so wie bi euch, hehehehe!

Tschuess Adi