Tja, isch wieder es Zytli her wo euch brichtet ha was bi mir eso abgeit, de losed (lesed) itze mau zue.

Ds letschte wo i ds Canada no agstellt ha, isch in writing on stone NP ds gah. Nid schlecht, vorauem die Hoodos  gseh guet us. Danebe hets no die Gravierige vo de Indianer gah, o das mit em Outo isch es Orginals!! wahrschinlech sletschte vom ne Indianer, naer si nume no Wissi am umelritzle gsi, schad.

Denn de Grenzuebertrit isch problemlos ueber d`Buehni gange, has mer schlimmer vorgstellt. Nach oeppe ere haub Stund bin i i de USA gsi.

Naechst Programmpunkt waer de Going to the sun Strass im Glacier NP gsi, leider isch si no under Schnee gsi, so ha i haut de NP zersch vo Oschte , de vo weschte i Agriff gno. Bi o no chli dert am umewandere gsi, wobi i mit em ne Schwarzbaer Bekanntschaft ha gmacht. Ca. 20m Distanz isch fuer mi grad echli nach gnueg gsi, doch zum Glueck het dr Baer anders vor gha (Herzschlag weiss nid wie hoech-> Foto).

Naechscht Aloufpunkt isch de de Hells Canyon, die tuefscht Schlucht vo de USA, gsi, doch vorher hets e neue vordere Pneu gaeh, wo o scho wieder duere isch!!

Wies haut so bi mir isch, isch de Zeltplatz zoberscht obe no maechtig under Schnee glaege. Me kennts ja langsam. Ha aber nueme abe woelle, isch scho Achti gsi, de han i haut mis Zelt am Waegrand ufgschlage, o nid schlaecht, nume chli chuel gsi.

Ir Umgebig vo dem Canyon hets wunderbare Schotterpischtene, we dr mau ir Gegend sit.

Uf em Waeg Richtig Yellostone NP isch zersch de Craters of the Moon NP u aschliessend de Grand Tenton NP glaege. Craters of the Moon isch es riesigs Lavafeld mit es paarne Kratere drin inne. Ha dert drue Taeg verbracht mit echli umeloufe u Fotone knipse (klar das es mi o wieder richtig verschiffet het, bi so ere Wanderig). Zum Teil cha me i Hoehline oder Tunnel abstiege, wo fruehner d`Lava duere gflosse isch, nachdem`s obeduere abkaltet u fescht worde isch.

De witers am Grand Tenton zue, das sie es paar Berge wo sich us em Nued so Richtig id d`Hoeche ufstelle tue. Nid es schlechts Panorama. Dert hets mi de o packt u i bi mit em ne Kajak echli underwaegs gsi. Ds Resultat isch das mer itze Blattere a de Haend hett u nid a de Fuess.

Im NP cha mer o teilwies uf unbefeschtigte Strasse underwegs si, 4WD empfohle isch gstande, has aber mit mim 1WDli trotzdem probiert u bi sogar duerecho, ohni uf d`Schnouze ds gheie. Teilwies wuerlech no es paar Schluesselstellene gha. Derbi han i mi no als Bisontrieber agstellt, die Viecher hei eifach nid vor Strass woelle u i nid eso a dene verbi ( isch lang gange bis die endlich begriffe hei das Fuessgaenger uf ere Strass nued verlore hei).

Denn im Yellowstone NP underwaegs gsi, taeglich Raege ab em mittag oder sogar Schnee. Isch no cool wenns souchalt isch und im Nebel vo sore warme Quelle steisch ( bis wieder uf e Toeff soettsch). Die Geysire u Hot Springs si wuerklech e Betrachtig waert, o wenns echli viel Volk hett (z.B. am Old Faithfull Geysir, bi sogar no zur richtige Zyt derte gsi fier ne Usbruch ds gseh).

Bi itze oeschtlich vom Park in Cody acho ( natuerlech ou wieder bi Schneegstoeber underwegs gsi). Die Stadt isch vom Buffalo Bill irgendwiegruendet worde, bzw. er het es Hotel hie ufboue u itze mache sie Profit drus use. Western Feeling pur.

Ds naechst wird si das i Richtig Colorado fahre u dert die verschiedene Paerks echli besichtige tue.

So itze wuensch euch wieder irgend oeppis, bis spaeter