Es tuet mer leid, oder au noed, das dir so lang uf diese Bricht heit muesse warte

Nach dr Sprachschuel bi i nochli duer Mexiko tuckeret, mau duer d'Berge mau ar Kueschte entlang je nach Beliebe. In Oaxaca het's e laengere Ufenthaut gaeh, da i uf mini neue Reife gwartet ha. Dert isch o wieder e naechschte Treffpunkt mit Olly, em Englaender, abgmacht worde. In San Christobal hei mer ues de wieder vereint u echli spaeter si mer zaeme mit ere Duetsche Backpackerin d'Ruine u de Urwald in Palenque go gnuesse, inkl. Termite esse. S'naechschte Ziel isch naer de Lago de Atitlan i Guatemala gsi, wo wuerklech e Bsuech wert isch. Wunderbar mit Vulkane umsuemt isch de See saelber o vom ne Vulkanusbruch entstande. Magischi Kraeft wuerke doert, isch ues gseit worde. Si zwar echli spaeter als eigentlich plant los cho vo dem Fleck, aber mir si wieder unterwaegs. De isch Antigua, Guatemala, uf de Spiescharte gstande. Stadt selber isch eiggentlich nid eso bsunders, abgseh vo dem duemmschte Kopfsteipflaschter vo i bis itze gfahre bi, derfuer cha mer ir naechi de Vulkan Pacaya bestiege wo aktiv isch u im Lavastrom Mashmellows grille. Si vo dert us naer ohni groesseri Umweg Richtig Grenze vo El Salvador gfahre, dert 3 Taeg brucht zum duerefahre, de Honduras i eim Tag hinder ues bracht u si itze sit witerere drue Tag in Nicaragua. Da ues die ganze Grenzformalitaete gschluchet hei, isch de aecht muehsam zum Teil/bzw. koschtspielig, hei mer beschlosse hie in Granada am Lago de Nicaragua es Paeusli i ds lege u viellech d'Isla de Ometepe ds bsueche, isch aber no offe.

Sowiet wieder emau d'Kurzfassig vom erlebte, usfuehrlich nerve i euch de we i wieder dehei bi.

Wuensch euch wieder e gueti Zyt, nervet nech nid ds fescht bim Arbeite oder was o immer, Gruess Adi